كريم الاساس المفضل لهذا الشهر ..

مرحبا جميلاتي ..
موضوعي اليوم وايد متحمسه له ,, بصراحه من اكثر الأشياء اللي حبيتها بفتره قصيره و ابشركم خلصتها بعد من كثر ما استخدمته و هو كريم الأساس من لوريال المعصار الجديد اسمه infallible 24h-matte درجتي 32amber سعره 80 درهم تقريبا من لوريال باريس تلقونه فسنتر بوينت , وايد وايد حبيته انا بشرتي قلبت دهنيه حاليا وايد ناسبني و ثباته وايد واااو يثبت و يظل مثل ما هو فوق 7 ساعات ما شاء الله الويه يقلب صفحة نظيييفه و مرتبه تغطيته ميديوم بس اذا حطيتي طبقه اكثر ممكن يصير فل على حسب بشرتج و عيوبها ريحته غريبه شوي كانها ريحة قرفه و احطه بفرشاه البافينج برش من ريل تكنيك الذهبيه بدون ما استخدم البيوتي بلندر يتوزع بنعومة احسه يندمج مع البشره و مسامها بسهولة يغير شكل البشره نهائيا انصح كل وحدة تجربه الا اللي بشرتها شديدة الجفاف ممكن ترطب بشرتها عدل اول و عقب تستخدمه ان شاء الله يضبط , ما استخدم فوقه بودرة عشان يثبت احس مافي فرق لان الفنش ماله فلفت مخملي ناااعم اممم ما افضل تاخذون درجة غير افتح او اغمق عن درجتكم يفضل يكون نفس درجتج بالضبط في منه واااايد درجات هذا احلى شي فيه تخيلوا انا ماخذة درجة بالضبط نفس لون بشرتي و أحيانا ما احطه على رقبتي تحت و ما احس بالفرق نهائيا , بالمناديل ينشل بسرعه ما يعذب , شو اقولكم عنه بعد ؟؟؟ باختصار اذا مليتي من فاونديشنج او حابه تغيرين كريمج فانصحج تجربينه راح تكون تجربة جميله يمدحون البرايمر بعد منزلينه معاه بس ما حصلته لما سرت بجربه ان شاء الله .
هذا كان رفيو سريع عن هالفاونديشن الجميل أتمنى تكونون استفدتوا و اللي مجربة يا ليت لو تخبرنا تجربتها معاه .
الله يحفظكم جميلات مرايم ,, دمتم بوود ..





 

مفضلاتي من ماركة لوريال باريس

هلوووو جميلاتي ,,
من زمان ما كتبت عن مفضلاتي اليوم ان شاء الله حابه أتكلم عن براند واااايد احبها و تقريبا جربت كل شي و هالشهر تحديدا خذيت كم شغله زيادة و حابه اذكر لكم شو هو مفضلاتي من لوريال , اول شي راح أتكلم عن فاونديشن ترو ماتش خفيييف حيييل و تغطيته ميديوم و ما يكون طبقة ممتاز و مثالي للبشره المختلطة الجافه و اللي تميل لتكون صافيه خاليه من الندوب و الحبوب لان تغطيتة مب فل , قوامه سائل و هالشي حبيته لان البشره تمتصه بسرعه و ما تحسين انج حاطة فاونديشن يدهن عن التي زون بعد تقريبا ثلاث او اربع ساعات سعره 80 درهم تقريبا , مسكارا بتر فلاي راح انزل لكم صورتها تحت فرشاتها جهتين جهة للتكثيف تكون شعيراتها صغيره و جهة ثانيه شعيراتها متصاعدة فالطول تبدا طويله و تقصر عن اخر ها عشان تعطي طول و تحتوي كل الرموش من اول العين لاخرها سعرها تقريبا 90 درهم سوادها عجيب و ما تعذب لما تشلينها , محددات الشفاه من لوريال أيضا جميله كريمية ما تنشف و تقطع لونها ثابت و يظل وقت طويييل فوق السبع ساعات و ما تنشف الشفايف كللللش و لما تشلينها أيضا تنشال بنعومة اسعارهم من 40 درهم اعتقد مب متاكدة , ايلاينر الريشه حبيته سواده عجييييييب بس شغله وحده ضايقتني فيه طرف الريشه مب حاد غليظ شوي بس هالشي يساعد حيل البنات اللي توهم يتعلمون ع اللاينر سعره 90 درهم أيضا ما استغني عنه خاصه لما احط ميكب ع السريع ارسم عيني بسرعه فيه , فاونديشن انفياليبل 24 مات وااااايد رهييييب توني اجربه من أسبوع تقريبا روووووعه صدق ثاااابت فوق السبع ساعات وايد واااو ماااات حيل يخلي بشرتج مخمليه حيل و يتحكم بالدهون عدل و الوانهم عجيبة الدرجات رهيبة بصراحه انا خذيت 32amber هذه درجتي بالضبط نفس لوني بصراحة احس كاني حاطة صفحة على ويهي هههههه انصحكم فيه ب 80 درهم اعتقد , ما جربت ارواجهم بس يمدحونها بعد راح اجربهم يوم ان شاء الله , المهم هذه كانت فقرة مفضلاتي من براند لوريال باريس خبروني انتوا شو تحبون ؟؟
الله يحفظكم جميلاتي ,, دمتم بود ..












 

مسام البشره

مرحبا جميلاتي ..
حابه أتكلم اليوم ان شاء الله عن موضوع ارقني و ازملي حياتي للأسف و صرت متعقدة منه و افكر كيف اتخلص منه و شو علاجه ؟؟ موضوع حبوب الوجه الدهنيه اللي تنتج عن توسع المسام و تراكم الدهون فيها , طبعا انا وحده بشرتي مختلطة مايله للجافه و لكن مع تغير الجو صارت بشرتي مختلطة مايله للدهنيه او تكاد تكون دهنيه ما كنت اعرف ماناة اللي بشرتهم دهنيه لين جربت الشي بصراحه احس صعب ان الوحده تتعامل بسهولة مع البشره الدهنيه او اللي تعودوا عليها يمكن عادي عندهم بس بالنسبة لي كان شي فظيع ما عرفت شو استخدم و لا شو اللي يناسبني و خذت وقت وايد طبعا و هذا شي طبيعي لين عرفت كيف اقدر اتحكم بكمية الدهن و اخفف من حجم المسام و لله الحمد وصلت لنتيجة جميلة و فعالة أخيرا , و قلت ما راح ابخل عليكم بتجربتي و أتمنى انها تنفع وياكم  تستفيدون ان شاء لله , خلوني اول شي اخبركم شو اللي صارلي بالضبط !! فجاة قمت من النوم اكتشفت ويهي وايد فيه حبوب صغيره تشبه حبوب الحساسيه و اعتقدت قبل انها حساسية بس بعدين اكتشفت لا شفت المسامات متوسعه حيل و داخلها دهون متراكمة اسفه ع الوصف بس صدق هذا اللي صار طبعا اخترعت و قمت استخدم سكرابات حيل عشان تنظف المسامات و ما فاد قلت اجرب غسول للبشره الدهنيه و بعد ما فاد و زادت الحبوب و اهني تعقدت خلاص قلت لا خل أوقف كل شي استعمله لبشرتي كل شي و تركت كل شي تقريبا ثلاث أيام و عقب بديت اغسل ويهي بصابونة لايف بوي مرتين الى ثلاثه يوميا خاصه اول ما اقعد و قبل النوم و لما اطلع برع الصبح احط بس بيبي غارنيه عشان الحمايه فيه عاليه و اول ما ارجع البيت اشله و اغسل ويهي بصابون وأول شي سويته اني استخدمت ماسك البركان من بيرفكت عشان يوسع المسام و اقدر انظفه عدل بس مرة وحده و عقب بديت يوميا الصبح اخذ قطعة ثلح و الفها بقماش قطن و اسوي مساج على مناطق المسام لان البرودة العالية تشد و تسكر المسام و بعدين قلت عشان انشف الدهن لازم ليمون اخذ نصف ليمونة و افرك فيها ويهي ف مناطق المسام و الحبوب تحديدا و اخليه ربع ساعه طبعا يحرق وايد بس نتحمل , و اخر شي سويته و وايد فادني ماسك العسل بالليمون احطه على ويهي عشرين دقيقه و اغسل و الله يا بنات هالطريقة فعاله جدا خلال أسبوع ان شاء الله راح تشوفيه كيف ويهج نشف و المسام انشد و للحين مستمرة على هالعلاج و راح ابتدي استخدم منتجات مثل كريم ليل للبشره الدهنيه و راح اصور لكم قريبا كل المنتجات و اعطيكم رفيو عنها مثل ما قلت لكم حاليا موقفة كل شي عشان اريح ويهي و بشرتي و من ابدا راح انزل مدونة يديدة باذن الله .
أتمنى اللي تجرب طريقتي تخبرني اذا فادتها او لا و راح أكون ممنونة لكم مشاركتكم جميلاتي .
الله يحفظكم ,, دمتم بود ..






 

العنايه بالشعر ..

مرحبا جميلاتي .. مر وقت شوي من اخر مدونة نشرتها ما عليه سامحوني و ان شاء الله أحاول ارتب اموري و انظم وقتي اكثر هالفتره شوي مب قادرة اسيطر على الوقت ما شاء الله مخبوصه عدل ,, المهم ما علينا اليوم ان شاء الله راح أتكلم عن موضوع العنايه بالشعر , طبعا اهم شي فالشعر بالنسبة لي هو العنايه بفروة الراس و ترطيبها عشان تكون بصيلات الشعر بصحة ممتازة و مما راح يخلي الشعر ينمو بشكل طبيعي و صحي , افضل شي تسوينه انج تدهنين شعرج كامل مع مساج لفروة الراس لتنشيط الدورة الدموية و الله يا بنات المساج يساعد وااايد في تنشيط الدورة الدمويه و هالشي بدون شك راح يؤدي الى تحسين صحة البشرة و اللي راخ يخلي النتايج تكون سليمة , من الزيوت اللي وايد احب استخدمها زيت جوز الهند الطبيعي و زيت الزيتون و أيضا زيت الحية أتوقع هالثلاث أشياء افضل شي لترطيب الشعر و فالفترة الاخيره وحدة من اهلي جربت زيت دابر املا و الله يا بنات بدون أي مجامله صار شعرها غلييييظ حيييل ما شاء الله تغير 180 درجة سبحان الله طبعا ما تغير بين يوم و ليلة اللي تبي صدق تغير شعرها و تبيه يغلظ و يصير صحي و يكثف عليها بزيت دابر املا و لازم لازم تستمر عليه على الأقل ثلاث شهور و مرتين أسبوعيا تحطه و تنام فيه و تقوم الصبح تغسله و راح تشوف النتيجة ان شاء الله , و لا تنسون الماسكات و حمامات الزيت الحين وايد بنات يقولون ما نحب ريحة الزيت و ما يروح بسرعه يعني لازم زيت مافي بديل امبلا اكيد في و هو حمام الزيت و البلسم و الماسكات الاسبوعيه , بالنسبة للماسكات انا مجربة وايد أنواع احسنها كريستاس كافيار من لوريال جمييييل جدا جدا أتوقع كل منتجاتهم عجيبه و تلقونه فالجمعيات أتوقع سعره حول 250 درهم غالي شوي ممكن تستخدمين أيضا ماسك غارنيه بالعسل اشوفه بديل رخيص تقريبا يعطي نفس نتيجة ماسك كريستاس و لازم تعطون الماسك وقته يعني تغسلين شعرج بشامبو بعدين تحطينه و لفينه و تلبسين كاب و تظلين فيه عشرين دقيقه الى نص ساعه و عقب تغسلينه , اما بالنسبة للبلسم انا استخدمه كل يومين تقريبا لانه مهما كان الشامبو زين احس لازم ينشف الشعر شوي فالبلسم راح يرطبه احب وايد بلسم من ويلا و من دابر املا الكولكشن الجديد و أيضا من بانتين هذيل المفضلين عندي تقريبا , طبعا في علاجات أخرى للشعر مثل الكولاجين و الكيراتين الحين بقولكم انا ما افضل الكيراتين بصراحه ما ادري احسه قوي على الشعر شوي يمكن مع الوقت راح يهلكه احس الكولاجين وايد اهدا و احسن عن نفسي ما جربت و لا واحد بس اكثر البلوقرز يمدحون الكولاجين , و طبعا احب انبه على شي وايد مهم اللي هو تعريض الشعر للحرارة مثل الاستشوار و غيره لازم و ضروري قبل لا تعرضونه للحرارة انكم تحطون طبقة واقيه مثل الزيوت الواقيه او الحامية من الحرارة و بنصحكم بزيت لوريال واااايد احبه , و بالنسبة للي تعاني من تقصف فالشعر و الأطراف خصوصا انصحها باستخدام سيروم مناسب لترطيب الأطراف يوميا و انصح بسيروم من لوريال و من غارنيه وااايد ممتازين , و بعد بنوه على شغله اخيره و اللي هي أهمية القص , قص الأطراف و تهذيبها من فترة للثانيه هالشي يقلل من تقصف الشعر و خصوصا الأطراف و احسه يعطي الشعر حيوية و يحفز نموه و طوله و انتبهوا بنات من القص باستخدام الموس مضر جدا جدا يخششن الشعر و يخليه متقصف و بتتعبين لين تعالجينه فاتركوه و خلكم  ع المقص وايد احسن , بالنسبة للصبغات راح أتكلم عنها بشكل مفصل اكثر فالمدونة الجايه ان شاء الله لانه راح يكون بروحه موضوع طويل .
هذا كان موضوعنا اليوم أتمنى تكونون استفدتوا , الله يحفظكم جميلاتي ,, دمتم بود ..








 

طريقة توزيع الكونتور على الوجه

مرحبا جميلاتي ,,
اليوم ان شاء الله راح اكتب عن موضوع يمكن كتبت عنه قبل بس دايما يتكرر علي الطلب و حاضر من عيوني راح اعيد صياغته و يمكن اضيف شوية معلومات زيادة ,, الكونتور هو طريقة لتحديد ملامح الوجه و ابرازها بما فيها تصغير الانف و تحديده ابراز عظمة الفك السفليه و تحديد الرقبه أيضا و ممكن لتصغير مساحة الجبهة اعلى الوجه , يعني بالكونتور راح تصغرين كم سنة بالعمر ههههههه لا صدق يغير ويهج اذا استخدمتيه عدل و بطريقة صحيحة , ممكن نستخدم كونتور كريمي مثل الكريم يكون قوامه يوضع بفرشاه مخصصه و يوزع بفرشاه أخرى مخصصه لدمجه و توزيعه و ممكن تستخدمين كونتور بودرة يكون يا اما بودرة مضغوطة و هذا الأكثر استخداما او بودرة حره , الكونتور يكون غالبا لونه بني غامج و ممكن تستخدمين لون بني فاتح شوي لمنطقة الانف فقط و عموما يختلف أيضا على حسب الوان البشرات و على حسب نوع الميك اب ثقيل خفيف سهرة او صباحي , طبعا اول خطوة هي تنظيف البشره بغسول متوازن و الخطوة الثانيه ترطيب الوجه بكريم مرطب مع مرعاة ترطيب منطقة تحت العين بمرطب خاص للعيون و الانتظار فتره لين تمتص البشره الكريم يعني خمس الى عشر دقايق بس و بعدين نبدا نحط برايمر بكمية بسيطة جدا فقط فالمناطق المراد تحسينها مثل مناطق المسام و غيره و الخطوة اللي بعدها نوزع كريم الأساس باستخدام فرشاه خاصه للتوزيع تكون غالبا مسطحة على حسب قوام الكريم أيضا مثلا الكريم السايل يحتاج فرشاه مسطحة و الكريم الباودر يحتاج فرشاه كبيره كثيفة و قوية نوعا ما و عقب نطبطب بالبيوتي بلندر لاعطاء الوجه صفاء و نقاوة اكثر و الحين يا دور الكونتور انا افضل الكونتور الكريمي لانه سهل الدمج و بنفس الوقت ثابت اكثر من الكونتور الباودر و ممكن الباودر بعد اذا كان من النوع الثابت اللي ما يتحرك فترة طويله , بالنسبة لي انا استخدمت كونتور ستيك من ميبلين كوليكشن فيت مي راااااائع جدا و سريع و سهل المدج وايد حبيته ارسم بالاستيك نفسها خط على اسفل عظمة الخد (اعلى الفك ) يمين و يسار بالاتجاهين و شكل قوس على طول الجبهه و احدد عظم الفك السفلي كامل من تحت عند بدايه الرقبه من الوجه يعني و اذا حابه تحددين الرقبه بعد يكون افضل عشان يكون متناسق مع الويه الفكرة من الكونتور بنات هي انج تبرزين بعض الملامح يعني أي شي حابه انج تبرزينه تكنترين تحته كانه ترسمين له ظل ف يبين مرتفع واضح و ممكن مستقيم و ضعيف (الانف ) , طبعا بعد ما ترسمين الخطوط بفرشاه مسطحة او بالاستيك نفسها ممكن تبدين تدمجينه بكريم الأساس و توزعينه تحتاجين لهالخطوة فرشاه تكون شعيراتها كثيفه جدا مستطيلة متساوية الطول او مدرجة الطول راح احط لكم صور تحت ان شاء الله , عقب تثبتين الويه كامل ببودرة مضغوطة , اذا كان عندج مناسبة و حابه الكونتور يطول معاج افضل انج بعد ما تثبتينه ببودرة مضغوطة تستخدمين كونتور باودر بس تردين تعيدين عليه و تدمجينه بنفس الفرشاه بحيث ما يبين خطوط و يكون منظر طبيعي , انا استخدم برونزر من اتش اند ام ك كونتور باودر اغمج درجة ,  و استخدم أيضا أي أي شادو لونه بني ممكن ينفع بس ديروا بالكم بعضها لما تحطين وايد على الفرشاه ما راح يخوز بسهولة ف بخرب لج المكياج كله جربوا شوي شوي و ان شاء الله يعجبكم .
الله يحفظكم جميلاتي,, دمتم بود ..














 

اشياء ندمت اني شريتها ..

هلوووو جميلاتي ,,
اممممم ما كتبت ولا مرة عن منتجات ندمت اني خذيتها او حتى عن مفضلاتي للشهر راح ابتدي اكتب ان شاء الله كل شهر مدونة خاصه بأشياء شريتها و صارت من مفضلاتي و العكس ,و حاليا راح اخصص هالمدونة لاشياء ندمت اني شريتها ..
امممم في وايد أشياء و قبل لا ابتدي فالموضوع راح اقولكم شي مهم : طبعا اكيد مب شرط اذا انا ما حبيت المنتج ان المنتج سيء و قلا تشترون منه ابدا او أي شي من هالقبيل , بس اللي حابه اوصله لكم اني من خلال تجربتي ما ناسبني الشي او ممكن أكون ما عرفت له عدل ممكن لاني فالاخير اتعلم و الواحد مهما وصل لمرحله انه يفهم في موضوع معين راح يكون ناقص هذا من خلال مفهومي انا ان نحن من خلال تجاربنا اليومية كل يوم نتعلم شي يديد , اذا اتفقنا على هالنقطة مع بعض راح تسهلون علي و تتقبلون رايي باي شي مب بس انا بنات حتى أي شي ثاني ممكن يمر عليكم بحياتكم تعاملوا معاه بنفس الطريقه بعقليه منفتحه و بنصحكم بشي ثاني بعد دايما عطوا العذر لاي شي و قولوا يمكن !!
المهم من المنتجات اللي ما حبيتها كلش و اللي ما راح ارجع اشتريها للأسف : 1- بودرة ستوديو فكس nc40 , اه يا ربي شو أقول عن هالبودرة ما قدرت استخدمها ب ولا شي كل ما احطها و اعطيها فرصه اندم واااايد .
2- فاونديشن بورجوا منيرال مات , مول ما حبيتها تكتل و سخيفه ما ناسبتني حتى جربتها لما صارت بشرتي اقرب للدهنيه بس مافي فايدة .
3- كونسيل كوريكتور من ايسادورا , عباره عن علبه فيها كونسيلر و كوريكتور و هايلايت و لا حبيت فيها شي غير الهايلايت شوي ممكن أقول عنه مقبول خساره ع الفاضي اكيد ما برجع اشتريه يتكتل و يتلزق و ما ينشف .
4- مناديل جونسون الكيس الأصفر  , ريحتهم خايسه على أساس ما فيهم عطر و جذيه بس حتى ما يمسحون عدل حسيتهم
5- مزيل نيفيا لمكياج العيون , شريته من قرن يمكن هههههه استخدمه يالله أحيانا بس عشان اصحح فيه أخطاء الميك اب بعود قطن ما اعتقد ارجع اشتريه باخذ شي احسن ان شاء الله .
6- بيوتي بلندر من فلورمار , يمكن اسوء شي شريته بحياتي ما بتكلم اكثر .
و ان شاء الله المدونة اليايه راح تكون عن مفضلاتي لهالشهر .
الله يحفظكم جميلاتي ,, دمتم بود ..














 

لوز باودر (البودرة الحرة)

مرحبا متابعاتي الجميلات ..
موضوعنا اليوم جدا مفيد و مهم لاي وحده عشقها الميك اب و تفاصيله خصوصا مكياج المناسبات , راح أتكلم اليوم عن اللوز باودر و عن تجربتي المتواضعه و خبرتي البسيطة ان شاء الله , اول شي اسويه كالعاده اني اعرف المنتج اللي راح اسوي عنه رفيو , شو هو اللوز باودر ؟؟ عباره عن بودرة حره متناثره غير متماسكة او مضغوطة تستخدم لتثبيت المكياج ك كريم الأساس و الكونسيلر و بعضها يكون يعطي اضاءة منيره لمنطقة تحت العين , امممم انا عن نفسي وايد شفت رفيوهات لبلوقرز عربيات و أجانب و لما قررت اني استخدم وحده دورت وايد و اخترت الأفضل ان شاء الله , البودرة اللي انا استخدمها هي من بن ناي لاكسيريوس بانانا باودر , طبعا هالبودرة معروفه انه المشاهير يستخدمونها مثل كيم كارداشيان , هي منها اكثر من لون في الأبيض او الشفاف تصلح لتثبيت الوجه و منطقة العين و لمختلط الوان البشرات و الاندر تونز , و منها اللون الأصفر اللي يناسب اكثر البشره الحنطية المايله للسمار , و منها لون وردي خفيف تناسب البشرات البيضاء , و اعتقد منها لون بني بعد مش متاكدة , طبعا انا اول شي راح أقوله عنها انها لها عيب ما احبه ابدا و هو اني لما أتصور اكتشف ان في لون قوي اصفر تحت العين و هالشي الوحيد اللي ما حبيته فيها للأسف , بس بما اني ما أتصور وايد فانا استخدمها لتثبيت الكونسيلر , بعد ما اوزع الكونسيلر بالبيوتي بلندر و انتظره لين ينشف احط شوي من البودرة بفرشاه كبيره و اوزعه بسرعه حتى يدخل بين خطوط العين و يثبت الكونسيلر و يعطي منظر منور مرتب جميل و ناعم , البودرة مش متوفره بالمحلات عندنا انا طلبتها من تاجرة بالانستقرام و سعرها 85 درهم العلبه الصغيره , انصحكم تاخذون العلبه الصغيره كميتها ممتازة و تطول معاج وايد و ان شاء الله تعجبكم طبعا مهم جدا تختارون الدرجة اللي تناسبكم مثل ما ذكرت فالموضوع والاهم انكم تعرفون تستخدمونها صح .
هذا كان موضوعنا المتواضع اليوم أتمنى انكم تكونون استفدتوا , انا انتظر أي تعليق او انتقاد بناء كان او لا حياكم الله .
الله يحفظكم جميلاتي ,, دمتم بود ..




 

الماسكات

شخباااركم جميلاتي ؟؟
اليوم يايبتلكم موضوع وااايد تكرر عليه الطلب فالدايركت مسج ف الانستا , و هو موضوع الماسكات , انا تكلمت قبل عن الماسكات الطبيعيه اللي نسويها فالبيت بنفسنا وفقا لنوع و لطبيعة بشرتنا و أيضا مراعاه الأجواء المناخيه اللي تتعرض لها بشرتنا ,  من وجهة نظري بشرتنا تحتاج دراسه نحن بنفسنا نسويها و لازم نجرب لين نعرف شو اللي يناسبنا و شو اللي فعلا يكون له تاثير على بشرتنا اذا ما جرنا بنفسنا عمرنا ما راح نعرف شو اللي يناسبنا , لا تحطون في بالكم انه مثلا بشرتي دهنيه خلاص ما راح تتغير و لازم اسنخدم كل شي خاص للبشره الدهنيه و ممنوع استخدم أي شي يرطب لا انتبهوا لان بشرتنا تتغير حسب المود و ممكن حسب الجو و ممكن حسب الروتين اليومي و الضغوط اليومية اللي نمر فيها فلازم نساعد بشرتنا عشان تتكيف معنا و نوفر لها افضل عنايه ممكنة , الماسكات لها دور كبير و انا انصح بشدة ان نستخدم ماسك أسبوعيا ضروووري لتخليص البشره من السموم و الدهون و لتنشيط خلاياها و شدها و لاعطاءها نضاره و صفاء و تالق , افضل الماسكات اللي استخدمتها للحين هو ماسك البركان من شركة بيرفكت جمييييييل هو اول ما احطه يحرق الويه و شوي شوي تخف الحرقة اخليه عشر دقايق الى ربع ساعه طبعا اول ما اغسل ويهي اشوفه تنظظظف و يللللمع و تفتح حيل وااايد جميل بس ما ادري اذا يناسب البشره الجافه لاني احسه ينشف شوي منطقة الخدود عندي باعتبار بشرتي مختلطة ولكن انا بعد ما اغسله ارطب الخدود بكريم مرطب , و ثاني ماسك جربته هو ماسك سويته بنفسي و انصح فيه حيل و هو عباره عن زبادي و ملعقة صغيره كركم و نقط ليمون و اخليه على ويهي عشرين دقيقه تقريبا و اغسله احس ان ويهي يصير مراية عجيييب وايد احبه , مناسب لكل البشرات و اذا بشرتج جافه زياده لا تحطين ليمون , و ماسكي الثالث عباره عن عسل فيه ملعقة سكر بني خشن ادهن فيه ويهي و اخليه لين ينشف بعد أيضا يشد البشره و يخليها ناااعمه , تقدرون تدشون النت و تبحثون عن ماسكات متنوعه و تجربون فالبيت و تشوفون شو اللي ناسبكم و تستمرون عليه , حاليا انا قاعده اختبر  ماسك الترطيب من سيفورا أيضا مدحوه حيل و قريب راح اوافيكم برفيو عنه ان شاء الله .
أتمنى تكونون استفدوتي جميلاتي .
الله يحفظكم ,, دمتم بود ..









 

البشره الحساسه

هاي يا حلوات ,,
وايد بنات ايوني فالدايركت ع الانستا و يسالون عن العنايه بالبشره الحساسه و انا وعدتهم اني أتكلم بشكل مفصل فمدونتي القادمه  وقررت اني اليوم أتكلم عنها ان شاء الله .
البشره الحساسه عباره عن بشره ما تتحمل أي نوع من الكريمات اللي تحتوي على معطرات و مهيجات و غيره و أيضا هي بشره بسرعه تتعرض للتصبغات و صعب علاج أي اثر فيها بسرعه مثل اثار حب الشباب و غيره و أيضا هي تحتاج عنايه خاصه جدا و واقي شمس ممتاز و تنظيف يومي مستمر , انا بشرتي حساسه و كنت قبل مستحيل اجرب أي منتج جديد خلاص اذا علقت على شي خلاص أخاف اغيره لانه باعتقادي اني راح اعاني منه و راح تتاثر بشرتي فكنت دايما أخاف اغير كريم الأساس و الغسول و غيره و اذا انقطع شي من السوق من منتجات ازعل و اتم متنكدة و مترددة باختيار بديل بس الحين لا قررت اكسر هالحاجز بالتحدي و قبل هذا اعتني ببشرتي و اعرف لها عدل محد يعرف لبشرتج غيرج لا تقولين صالونات و عيادات و دكاتره جلدية انا اقولج انتي ادرى وحده ببشرتج , اهم شي استخدمي دايما شي مناسب للبشره الحساسه و بالنسبة لكريمات الأساس عادي جربي اللي تبينه و اذا حسيتي انه يسد مسامج و يطلعلج حبوب مثل تجربتي مع أساس ماك فكس ستوديو تركته و خليته بس للمناسبات و غيري يستخدمه يومي عادي بشرتهم تتحمل اما انا لا بشرتي حساسه ذكرت قبل وايد كريمات الأساس اللي استخدمهم منهم ميبلين فيت مي و لوريال ترو ماتش و سيشيدو فيوتشر و بيبي غارنيه و بيبي ميبلين و بيبي ميشا الكوري أيضا , بس انتبهي لاااازم تنظفين بشرتج يوميا بغسول مناسب و بفرشاه انصحكم يا بنات الفرشاه مهمه انا استخدم فرشاه كلاراسونيك ميا 2 روووعه تحرك الدورة الدميو بالويه و تنظف عدل غير عن تنظيف المناديل و غيره , و طبعا لازم كريم ليل و كريم نهار و هكذا .
تقريبا هذه كانت طريقتي بعنايتي ببشرتي الحساسه و اذا عندكم أي استفسار انا حاضره جميلاتي .
الله يحفظكم متابعاتي ,, دمتم بود ..

 

 

موضة المكياج الجديدة (strobing)

هااااي متابعاتي الجميلاتي ,,
اليوم يايبتلكم موضوع جميل و فله .. طبعا هالفترة منتشر جدا في وسط الموضه استايل جديد للمكياج و حابه وايد اني أتكلم عنه انه صاير حديث الموضه و كل العارضات فكل المجلات تشوفون هالنوع اللي هو عباره عن سوربينج يعني مكياجي فيه هايلايت كثير و مستغنين عن الكونتورينج تماما و الشدو يميل انه يكون جلتري خفيف مش ثقيل وايد و المنتشر اكثر الوان الشامبين الأبيض بدرجاته و البيج بدرجاته كلها اما الايلاينر يكون خفيف مش سموكي و ثقيل و الهايلايت صاير على عظمة الخد و عظمة الفك السفليه و جسر الانف و بين الحواجب فوق شوي و و عند مدمع العين واعلى الشفه الاعلوية و في منتصف الذقن أيضا طبعا يفضل انج تختارين اهني كريم أساس ذو تغطية عاليه بفنش ديوي يعني بمظهر مش مات يكون ذو لمعة صحيه و يكون لونه افتح بدرجة بس من لون بشرتج و يفضل تختارين كونسيلر منور لمنطقة تحت العين تقريبا هذا اكثر شي اقدر اوصفه لكم عنه و بقى شي واحد وايد مهم لتكملة اللوك الستوربينج و هو الفيس سبراي مب عشان يثبت الميك اب بس لا عشان يخلي اللوك ملمع شوي و هذا هو اخر حديث الموضه فاذا عندج أي مناسبة عرس حفله و غيره دشي النت و شوفي رفيوهات و حاولي تطبقين كل جديد عشان تكونين محط انظار الجميع , أتمنى تكونون استفدتوا يا رب .
الله يحفظكم جميلاتي ,, دمتم بود ..

 

الهالات السوداء

مرحبا جميلاتي ..
موضوعنا اليوم جدا مهم و ضروري مو بس عشان شكلنا الجميل بعد عشان صحتنها ونفسيتنا و كل هالاشياء متراكمة و معتمده على بعضها البعض , مثال : يعني لو الوحده كانت نفسيتها مب زينة و عندها ضغوطات كثيره و اكلها غير صحي و نومها غلط كيف متوقعين يكون شكلها ؟؟ لازم نفكر باكلنا و طريقة معيشتنا و تفكيرنا لانه كله ينعكس على الويه و بعد على ثقتنا بنفسنا يعني الثقه تسوي شي عجيب فالويه غريب تزيده جمال سبحان الله لما الوحده تكون مقتنعه من نفسها و واثقه تلقون حتى ابتسامتها غير و لمعة عيونها غير تجذب تغري تخلينا نحس انها عندها طاقة كبيره و كمية انوثه و جمال مب طبيعيه , خلونا ندخل فصلب الموضوع على طول , راح اركز اليوم على الهالات السودا تحت العين و هي من اكثر الأشياء اللي تنتج عن قله النوم و التوتر النفسي و الإرهاق و الجهد البدني ما راح اذكر الأسباب لانها كثيره راح أتكلم عن طرق علاجنا لها و طرق ذكية لاخفاءها مؤقتا بالمكياج , لول و اهم شي هو الترطيب ترطيب هالمنطقة ضروري و ممكن بمجرد الترطيب راح تختفي بكريمات الترطيب مثلا او بماسكات منزلية مثل ماسك الروب و العسل و الخيار و الشاي الأخضر و ضروري قبل النوم يوميا نسوي مساج لهالمنطقة , لان المساج يساعد في تنشيط الدورة الدموية حوالين هالمنطقة و ممكن يكون السواد ناتج عن قلة تدفق الدم فهالمنطقة و خمول هالعضلات فحاولوا تسوون كل يوم مساج قبل النوم باستخدام جل مرطب او زين اللي يريحكم , و بعد قبل المكياج لازم تستخدمون كريم خاص للعيون عشان يحمي هالمنطقة من اضرار المكياج هالمنطقة جميلاتي جلدها جدا رقيق و حساس و اكثر شي يتاثر فالويه فاحسنوا اختيار كريمات الأساس بعد , بالنسبة للتقشير باستخدام سكراب ممكن بس يكون ذو حبيبات ناعمه و بحركات دائريه خفيفه مب بقوة و يفضل على طوول بعد الغسل تحطين كريم مرطب , بالنسبة للمكياج يعني أحيانا الوحده فجاة يكون عندها مناسبة و ما كانت تعتني بهالمنطقة شو تسوي اكيد ما بتطلع جذيه و تقول شو اسوي يعني !! اول شي انصحكم فيه انه تستخدمين فاونديشن فول كفر عشان تستغنين عن الكونسيلر افضل مثل ماك فيكس ستوديو استي لودر دبل وير سيشيدو او غيرهم , و اذا بتستخدمين كونسيلر و كانت عندج علامات قوية و الفاومنديشن ما يخطيها لازم تستخدمين كوريكتور لونه برتقالي بالنسبة لبشراتنا افضل البرتقالي الأجانب يستخدمون لون اخضر بعد ما ادري حسيت البرتقالي يناسب بشراتنا اكثر المهم توزعينه بس بفرشاه فقط على المنطقة الداكنة و بعدين تترينه ينشف و عقب تغطين المنطقة بكونسيلر أيضا باستخدام فرشاه خاصه و عقب تطبطبين ببيوتي بلنددر و تدمجين عدل و بعد تترين شوي لين ينشف و تثبتينهم بلوز باودر البودرة الحره و كذا تكونين غطيتي و نورتي المنطقة , نصيحة مني لكم جميلاتي ابدا لا تستخدمون كونسيلر قوامه ثقيل دايما خذي شي ناعم كريمي عشان ما تزيد التجاعيد بهالمنطقة و ما يتكتل المكان .
هذا كان موضوعي اليوم أتمنى انكم استفدوا , بنوه على شغله وحده وايد مهمه : أي شي تبين تبين نتايجه لازم تصبرين و تواظبين على الأقل شهرين باستمرار و إرادة مب تستخدمين كريم أسبوع تقولين ما منه فايده و تتركينه حرام عطوا كل شي فرصته و انتي اذا اهتملتي يومي سويتي وعشره لا عقب قلتي ما يفيد ما يصير طبعا اذا تبون حل سريع ممكن باستخدام علاجات ثانيه بالعيادات و غيره بس انا وحدة افضل اني بنفسي اسوي كل شي و اعتمد على نفسي لان هالشي راح يغير من شخصيتي و يخليني اعرف حق بشرتي حق شعري حق جسمي حق ويهي و شو اللي يناسبني و كيف ممكن ياثر فيني .
الله يحفظكم جميلاتي ,, دمتم بود ..




 

مفضلاتي من ماركة فور ايفر 52

مرحبا جميلاتي ,,
ماركة فور ايفر 52 من الماركات اللي بدت تطور بشكل ملحوظ و بصراحه انا صرت احبها وايد باستثناء كريم الأساس و البودرة و في كم منتج جربتهم من زمان و ابدا ما حبيت بس الحين نزلوا أشياء يديدة و أتوقع انه بيكون شي ممتاز قارنة ببعض المنتجات منهم اللي صارت من مفضلاتي اللي مستحيل استغني عنها و اهم شي الايلاينر القلم روووعه سواااده عجيب و ما ينشف بسرعه ابدا و ما يسيح كلش حتى مع الماي يظل ثابت و الرسم فيه سهل و مريح و عملي اللي تخاف من رسم ايلاينر و تقول ما يضبط معاي انصحج تبتدين تجربين هذا , ارواجهم واااااو مستحيل استغنى عنهم روووعه كل ما اتملل من ارواجي اروح اشوفلي من عندهم كريمية و ناعمه و ثابتة و ما تنشف احبها غراااام جد جربوهم , و الحين هبة يديدة من عندهم بعد اللب قلوس فظيييييع و الألوان نااااار كيووووت وايد حبيتها القلوس ناااعم و يرطب الشفايف وايد حلو , و في اكتشاف ثاني بعد توني اجربه و بعد اغرمت فيه و هو الكونتور كيت الصغيرون مالهم مكون من اربع الوان كونتور غامق للوجه و كونتور لون بيج فاتح هذا استخدمه لتحديد الانف فظييييع يا بنات انصحكم فيه و كوريكنور جربته اكثر من مرة بصراحه جميل و ممتاز و ثابت و فوقه الكونسيلر جيد بس مب واو شوي يتكتل بس بشكل عام هالكيت رووووعه بالنسبة لسعره و باقي مكوناته , في شي عندهم ما اعرف شو أقول عنه زين او لا ما ادري أتوقع يختلف حسب وجهات نظر البنات و هو الليب لاينر الألوان وايد حلوة و ثابت اقوى شي أتوقع ووتر بروف بعد بس ما حبيته وااايد يعني ها بس عندي كم لون ينشف الشفايف و يتخطط بس اذا حطيت قبله مرطب شفايف ممكن تصير النتيجة حلوة , انا وايد متحمسة لمنتجاتهم و لتطورهم السريع و اشوف وايد يفتحون كوشكات في مولات بسررعه قبل كانت تنباع هالماركة بس فمحلات الهنود و غيرهم الحين ما شاء الله و في شي بعد نسيت اقولكم عنه فرشاة الكونتور الناعمه عجيييبة وايد حبيتها صارت ادماني الجديد , راح انزلكم تحت صور بالمنتجات ان شاء الله .
الله يحفظكم جميلاتي ,, دمتم بود ..









 

ديرما رول

هلوووو يا حلوات ,, جميلات مراايم ..
اليوم ان شاء الله راح أتكلم عن تجربتي البسيطة مع الديرما رول , عباره عن رول يحتوي على ابر متساوية فالطول تبدا من  0.25 الى 2 سم , طبعا تستخدم حسب الحالات او الاضرار بالوجه و افضل انج ما تستخدمين اكثر من 1.5 فالبيت بنفسج او ممكن مع الخبره و الاستخدام تقدرين تتحكمين بالعلاج بنفسج , هي عباره عن علاج لاثار البقع و الحبوب و الندوب و غيرها من الاثار فالويه و مقلله أيضا لمظهر المسام و تنشط الكولاجين فالويه و تحفزه من خلال احداث ضرر لتقوم خلايا البشره بالتجدد و ببناء نفسها من جديد و هذا الشي اللي مخلي نتايجها عجيبة , أتوقع اذا ما خاب ظني انها تقنيه صينيه , ما علينا المهم انا طبعا خذيت وحده من موقع سوق دوت كوم و للأسف كان طول الابر فيها 1.5 ما كان المفروض ابدا بهالحجم المفروض ابدا من اصغر شي وشوي شوي , المهم اول الأيام لما استخدمتها كنت خايفة شوي و كنت ما اضغط بالمره من الخوف هههههه و قلت شو هذا يمكن ما منها فايدة , مع الوقت قويت قلبي و ضغط شوي للامانه في الم بسيط جدا و في احمرار فالمنطقة بس يروح على طول و يصير انتفاخ غير ملحوظ جدا , و لاحظت فعلا ان البشره تتغير تتجدد و علامات البقع ما راحت كلها بس خفت لاحظت الشي مع انه ويهي ما فيه بقع زياده صافي بس بشرتي من النوع اللي اذا طلعت حبة وحده فيها تعلم و ما تروح للابد ههههه اقصد تأخذ وقتت وايد يعني , استخدمتها مرتين فالاسبوع و بعدة اتجاهات و فقط بالمنطقة المراد علاجها و ليس الوجه بأكمله انتبهوا لهاي النقطة , طبعا مافي لا دم و لا غيره لا تضغطون زياده تحملوا , و ضروري جدا بعد العلاج تحطين على طول على ويهج التونر المناسب لبشرتج و بعدها كريمج الخاص , و طبعا قبل الاستخدام ضروري تعقمونها و كذلك بعد الاستخدام هالنقطة وااااايد مهمة لانها عباره عن ابر و بطبيعة الحال راح تحتاج الى تعقيم ممتاز و الا راح تصير عندج مشاكل و التهابات او حتى عدوى لا سمح الله , انا اعقمها بكوب فيه ديتول اخليها فيها ثلاثين ثانيه تقريبا و عقب اشطفها بماي دافي , ابدا ابدا لا تجربون اي ديرما رول حق غيركم انتبهوا بنات الله يخليكم , انا حبيتها و انصح فيها للي عندها بقع على ويها و اثار تحب انها تتخلص منها و تصفي ويها بس انتبهوا و التزموا بنصايحي و ان شاء الله راح ترضيكم النتيجة باذن الله , أتمنى يكون موضوعي فادكم جميلاتي .
انا حاضره لاي استفسار سواء اهني او بالانستا ع الدايركت او غيره حياكم الله .
الله يحفظكم جميلاتي ,, دمتم بود ..

 

فيس برايمر

مرحبا جميلاتي ,,
عيدكم مبارك وو كل عام و انتوا بخير و ينعاد علينا و عليكم بالصحه و يديم علينا الامن و الأمان يااارب , شخباركم بعد العيد سامحوني انشغلت عنكم وااايد الله يعين احس لازم ارد على وااايد كومنتات و أسئلة فالدايركت ع الانستا و ان شاء الله و فالكم طيب راح اجمع الطلبات كلها و اوعدكم اني راح أتكلم عن كل اللي خاطركم فيه , اليوم اخترت احد المواضيع اللي وايد انسالت عليه بالفتره الاخيره , دايما البنات يقولون لي مرايم شو احسن برايمر للويه او شو هو البرايمر و شو شغلته و كيف و متى نستخدمه ؟؟ اليوم ان شاء الله راح اكتب تجربتي و معرفتي المتواضعه بهالخصوص و ان شاء الله يعجبكم الموضوع .
خل نبدا اول شي بتعريف المنتج ؟ شو هو البرايمر ؟ البرايمر عباره عن كريم ثقيل نوعا ما شفاف اغلبه و يستخدم بكمية بسيطة جدا و على مناطق معينة فالوجه , مناطق التي زون او مناطق تركز الدهون مثلل الانف و الذقن و اعلى الوجه منطقة الجبهة و ممكن الخدين أيضا على حسب بشرتج , يعمل على تضييق المسام و التقليل من مظهرها يسدها تقريبا بالتالي راح يمنع ظهور زيوت الوجه و المنظر المزعج اللمعه اللي كلنا ما نحبها , طبعا ما يفضل استخدام البرايمر بشكل يومي لانه مثل ما قلت يسد المسام و هالشي مب زين اذا تكرر وايد راح يضر المسام و يخلي الويه يزيت اكثر و ممكن حبوب و غيره طبعا أي شي يمنع تنفس البشره يضر باختصار , بس أحيانا نكون محتاجينه للمناسبات للوك بيرفكت و غيره و انا افضل ان نحن نعالج بشرتنا احسن من الحلول المؤقته , اول خطوة بالمكياج بعد ما يكون ويهج نظيف هو البرايمر قبل كل شي هو اول شي تحطينه على ويهج و تعطينه فرصه خمس دقايق بس عشان يشتغل و ينشف اغلب البرايمرات تعطي ملمس بيبي سكن او مخملي خفيف للوجه و عقب تحطين الفاونديشن و باقي الميك اب , بالنسبة لي انا شفت وااايد فديوهات و رفيوهات و قريت وايد عنه عشان جذيه تشوفون اني اعرف عنه معلومات معقولة نوعا ما و لكن كاستخدام للامانه ما استخدمت غير برايمر واحد من ميبلين الأخضر البيبي سكن ممتاز ك بداية كان يعني خفف مظهر ن المسام و صدق بيبي سكن و لكن مشكلة الزيوت فالويه ما اخافها للحد المطلوب يعني اتم يمكن ثلاث ساعات بالكثير بدون ما يزيت ويهي و عقب يطلع كل شي احس , طبعا من خلال اضطلاعي على بلوقرز ثانيات اشوف الكل متفق على برايمر سماش بوكس الشفاف وايد يمدحونه بشكل خلاني اتحمس وايد اني اجربه و ان شاء الله قريب راح اجرب و باقرب فرصة راح اكتب الريفيو .
راح انزل لكم صور كالعاده للمنتجات أتمنى تكونون استفدتوا من خبرتي البسيطة .
الله يحفظكم جميلاتي ,, دمتم بود ..

 

 

 

العنايه بالاظافر

مرحبا جميلاتي ,,
موضوعنا اليوم جدا صغير و هو عباره عن عنايتنا اليومية باظافرنا ,, كيف نعتني باظافرنا بالطريقة الصحيحة و السليمه و اللي فعلا اتييب نتيجة , اول شي ابتعدوا تماما عن اصباغ الاظافر الرخيصة و اللي تحسون انتوا مع استخدامها انها تنشف و تضعف الاظافر و اختاروا الأفضل اللي يناسبكم , و لا تنسون قبل ما تحطون صبغ الاظافر تحطون طبقة من المقوي و هذا متوفر فالصيدليات اشكال و أنواع , و بالنسبة لمزيل طلاء الاظافر اختاروا طبعا بدون كلام الخالي من الاسيتون لانه واااايد يضر و الله انا مجربة كنت قبل ما اهتم بالنوع اللي استخدمه وبتركيبته بس عقب فتره انتبهت اني لا اصبغ اظافري و اكثر من مرة الاظافر تضعف تهلك شو السالفه اقتنعت أخيرا انه لازم استخدم مزيل مناسب خالي من الاسيتون و من ما تركته و انا اظافري بخير الحمدلله , و بقولكم شي مهم جدا جدا ,, لا تبردون اظافركم كل يوم انتبهوا انا كنت كل يوم جذيه اسوي للأسف و كله كانت تتقشر من الأطراف و شوي شوي تنكسر حراااام و ااتم زعلانه حيل و أقول انا اعتني فيهم انزين ليش جذيه ؟ و افضل انكم تسوون اظافركم بالبيت بدل الصالون لانه انا وجهة نظري محد يعرف لنفسج اكثر منج فتعلموا يا بنات بانفسكم ما عليه فتره بتحسوون اعماركم ضايعين و ما تعرفون شي و كل ما تسوون شي غلط ما عليه تعلموا من حقكم على أنفسكم انكم تتعلمون و تثقفون اعماركم و أتوقع كل وحده منا تبا تعتمد على نفسها و بالعكس تفتخر بعمرها اكثر لما حد يمدح عليها شي هي بنفسها سوته مب بس فمجال عنايتج بنفسج فكل شي حاولي انج تعتمدين على نفسج و تستغنين عن حاجة أي حد مهما كان عشان اذا فيوم انحطيتي فموقف ما تيلسين عاجزة و متوهقه و واقفه مكانج لا تكملين بنفسج و بمقدرتج و بكل ثقه , هذه اثمن نصيحه ممكن اهديكم إياها جميلاتي .
بالنسبة للفيتامين اذا كنتي وايد تعانين من تكسر و غيره انا انصح بفيتامين سبق و تكلمت عنه و هو زيت زهرة الربيع وايد زين ما يضر ابدا و من الفيتامينات اللي تتحلل فالجسم ما تترك رواسب ان شاء الله , و لا تنسوون تسوون سكراب لليد أسبوعيا تفركون اظافركم عدل و من عقبه ترطبونها عشان مثل ما انتوا تعرفون السكراب يشل الجلد الميت حوالين الظفر و الترطيب عشان ما تنشف اليد بعد السكراب , و قبل النوم طبعا لازم تخلون جنب سريركم كريم مرطب لليدين ضروووري خاصه اللي تشتغل فالبيت و تتعرف لمساحيق التنظيف و اللي تطبخ و غيره و اللي تطلع الصبح للدوام للكلية للجامعه للمدرسه بعد لازم ترطب ايدها و انصح اللي تتعرض يدها لاشعة الشمس وايد لازم تستخدم كريم مرطب فيها نسبة عاليه من واقي الشمس . هذا كل موضوعي لليوم و هذه طريقتي لعنايتي باظافري أتمنى تكونون استفدتوا .
الله يحفظكم جميلاتي ,, دمتم بود ..




 

افضل ايشدو مات

مرحبا جميلاتي ,,
اليوم حابه اتكلم ان شاء الله عن افضل ايشدو استخدمته بدون أي مجامله و وااايد مناسب لاي لوك للمناسبات و للايام العادية بصراحه رووووعه تقدرين تتحكمين بنوع لوكج حتى لو كان الشدو بسيط و ما فيه لمعه او الوانه بسيطة اهم شي بالنسبة لي ان الألوان تكون بقمنتد (واضحه) و يظل ثابت اقل شي ست ساعات , افضل شدو استخدمته و ما عندي عليه و لا أي تعليق و لله الحمد للحين هو ايشدو ماركة ذا بالم باليت اسمه (meet mat nude) كل الوانه مات ناعمه حيل لما احط منه بفرشاة الشدو ما يتنثر كلش و يتوزع بكل نعومة و سلاسه و احلى شي حبيته فيه الوانه فيه كم درجة بني و كحلي و ابيض و بيج روووووعه تقدرين تستخدمينه باي وقت مثل ما قلت لكم و بعطيكم طريقة بسيطة لوضع الشدو انصحكم فيها تعتبر خطوات أساسية جدا و اذا تعلمتيها ان شاء الله راح تقدرين تسوين أي لوك و أي طريقة فخاطرج , نبدا اول شي بعد ما ترتبين الحاجب و تحطين برايمر على جفن العين و بنصحج ببرايمر من بنفت اسمه (stay don't stray) حطي اول شي هايلايت تحت الحاجب و يفضل يكون فضي الى ابيج او بيج و بعدين اختاري لون يكون قريب من لون جفنج مثلا بيج او مشمشي و وزعيه تحت الهايلايت عشان بس يغطي المنطقة العليه من الجفن اللي ما راح نحط لها شدو , الخطوة الثانيه تحطين لون ابيض او أي لون فاتح افتح شي على بدايه الجفن العلوي من عند منبع الدمع و حاولي تنزلينه للمدمع السفلي بعد شي بسيط , الخطوة اللي بعدها تحطين لون شدو اللي تبينه المفروض يكون اغمج بشوي عللا باقي الجفن من النص لين اخر شي و طبعا كل هالخطوات تحتاج فرشاه شدو مسطحه تكون فلفي شوي مب مسطحه حيل و يفضل يكون شعرها شوي نتفة يعني خشن مب وايد و غير مرتب , الخطوة الاخيره تقريبا تحطين لون غامق جدا بالنسبة للألوان اللي استخدمتيها لازم يكون اغمق منهم و تحطينه باخر العين و توزعينه فوق و انتي داخله لنص الجفن بس انتبهي كانج ترسمين خط بشكل قوس فوق الجفن فقط و اخر شي تستخدمين فرشاه خاصه للدمج تكون عريضه شوي عشان تدمجين أي خط او فاصل بين الألوان , و اللي تعاني من انتفاخ في عينها تحت ممكن تستخدم شدو بني تحت الرموش السفليه او قلم بني و توزعه ببنسل برش و داخل لون بيج و يصير اللوك عذاااااب و لا تنسون أي لاينر فوق العين على حسب ما تحبون كامل او نص .
راح احط لكم تحت صور بالمنتجات اللي انصح فيها ان شاء الله .
الله يحفظكم جميلاتي ,, دمتم بود ..






 

افضل ثلاث كريمات اساس للاستخدام اليومي

مرحبا جميلاتي ,,
بمان ان العيد قرب قلت اشوف لكم موضوع تحتاجونه اكثر شي بهالفترة و هو كريم الأساس بالنسبة لي انا عندي ثلاث فاونديشنات مستحيل استغني عنها و هم : لوريال ترو ماتش , فيت مي ميبلين , هلثي مكس من بورجوا .
هالثلاث مستحيل استغني عنهم و استخدمهم و انا مرتاحه حدي يوميا بدون ما احاتي الكفر مالهم وسط و اذا زدتوا الطبقة ممكن يصير فول انا طبعا لان بشرتي مختلطة مايله للجفاف اكثر لازم احط قبل أي فاونديشن فالعالم كريم مرطب او برايمر يكون ترطيبه مناسب , لوريال محتواه وايد سائل فلازم بفرشاه و على الويه  و عقب نوزعه عدل بالبيوتي بلندر أحيانا اكتفي بالفرشاه بس جميل ناعم احسه يتبخر من الويه يختفي بس مو يختفي يعني ما يبقى له اثر و كانج ما حطيتي شي؟؟ لا بالعكس تحطينه و تحسين بشرتج تشربته و الفنش مات , ميبلين صاير حبي هالايام روووعه اعجز اوصفه جميل ناعم و ثابت و الفنش شوي ديوي خفيف مو وايد روووعه الاندر تون ماله على بشرتي وايد حبيته و اكيد لو خلص برجع اشتريه الى الابد أتوقع هههه , اما بورجوا هذا قصتي معاه قصه كنت استخدم القديم اللي كانوا اييبونه بعلب بلاستيك مع بمب لونه بني جان تذكرونه !! المهم كان عشقي كان هو الفاونديشن الوحيد اللي عندي و مستحيل اجرب غيره و لا يقنعني شي و الله يسامحهم من نزلوا الكولكشن اليديد خربوه اول شي سووه كم نوع احمر و وردي و لون ثاني ما ادري شو , المهم تغير طبعا استوى ثقيل شوي بس زين يمشي حاله و بعدني اشتري منه و استخدمه لانه ما يضر بشرتي لو استخدمه مرتين فاليوم مثل لوريال و ميبلين فاللي تحط فاونديشن كل يوم و تبى شي يناسب البشره الحساسه خاصه و تبي تغطية متوسطة الى فول نوعا ما انصحها بهالثلاث ممتازين و بأسعار اقتصادية , لوريال 90 درهم , ميبلين حدود 60 درهم , بورجوا ب حدود 60 درهم أيضا ما اذكر بالضبط .
الله يحفظكم جميلاتي ,, دمتم بود ..

 

 

فيتامينات لتقوية الاظافر و تطويل الشعر

+مرحبا جميلاتي ,,
ما ادري أقول مساءكم و الا صباحكم هههه المهم شو ما كان يعله يكون عسسسل ,, الموضوع جدا مهم خصوصا للبنوتات اللي يعانون من تكسر فالاظافر و ضعف فالشعر و اللي تعاني من ان شعرها ما يطول و غيره في نوعين من الفيتامينات انا شخصيا جربتهم و حابه اشاركم تجربتي المتواضعه و انصحكم شوي ,, اول شي قبل لا نستخدم أي فيتامين او مكمل غذائي لازم نتاكد من ان اكلنا صحي و من كمية الماي اللي نشربها و نحط في بالنا ان ممكن هالفيتامينات تنفعنا و ممكن ما تحدث أي فرق و بعد ممكن تضرنا اذا استخدمناها بشكل غير صحيح , الفيتامين الأول اللي جربته هو المشهور haie , skin &nails with biotin طبعا جربته مدة شهرين و اظن هالمدة كافيه لاني احدد اذا ناسبني او لا او شو النتيجة منهاول شي بقولكم انه واااايد غير ملمس شعري و نعمه و صار حيوي و لمعته ملحوظة جدا كنت اخذ حبة بعد الريوق الصبح طبعا يفضل تاخذون اللي يكون البيوتين فيه 3000 عشان يكون التركيز اكثر و تشربون ماي لانه ممكن يسبب رواسب و غيره و حتى اظافري بدون مجامله صارت قوية و ما تتكسر و الكل لاحظ الشي بس ما ناسبني تعرفون كيف ؟؟ طلعت لي حبوب شوي فويهي و فجسمي مع اني كنت اشرب ماي وايد عادي كالعاده بس ما ناسبني طبعا وقفته و تضايقت لاني جد استانست عليه ز و بعدين بدت رحلة بحثي لشي ثاني هههه سمعت بلوقر تمدح في فيتامين اسمه evening primrose oil with vitamin e طبعا هو عباره عن كبسولات جل باللون الأصفر من الفيتامينات اللي ما تترك رواسب و تتحل مع الماي فالجسم بسرعه وااااايد حبيته صار لي الحين اكثر من اربع شهور استخدمه مستحيل مستحيل استغني عنه رووووعه اظافري قوية و شعري لامع بس للامانه ما حسيته يطول شعري بس فظييييع انصحكم بشدة انكم تجربونه بس الله يعينكم على بلعه الكبسولة كبيره شوي , المهم ما طلع لي حبوب و لا تحسست معدتي منه و لا في منه أي مشاكل ان شاء الله . بحط لكم تحت صورهم ان شاء الله و أتمنى تجربونهم و تزودوني برفيو او اللي عندها فكرة و جربته تقولنا رايها ممكن مثل ما أقول دوم مو كل شي يناسبني يناسبكم .
الله يحفظكم جميلاتي ,, دمتم بود ..