جهاز تنظيف الوجه ( الفرشاه الالكترونية )

مرحبا جميلاتي ,, اليوم عندي لكم موضوع جميل و من مفضلاتي بصراحه , صارلي اكثر عن سنة تقريبا الحين استخدم جهاز لتنظيف الوجه و هي عباره عن فرشاه الكترونية اسمها كلاراسونيك ميا2 , طلبتها من موقع سوق دوت كوم بصراحه وايد احب اتعامل معاهم بسرعه يوصلني الطلب باقل من أسبوع لو كانت طلبيتي من برع يزاهم الله خير البضاعه توصلني لين باب بيتي , خذتها ب 680 درهم تقريبا كاملة مع الشحن و كان معاها راسين للبشره الحساسه طبعا على طلبي لان بشرتي واايد حساسه , طبعا خذتها بعد ما شفت رفيوهات واااايد من بلوقرز خليجيات و اجنبيات و كلهم قالوا انها هي التوب و الشي السلبي الوحيد اللي قالوه عنها هو انها بالبدايه راح تطلع لي حبوب وااايد تخوفت من هالموضوع لان بشرتي مب بالسهل انها تروح عنها الحبوب و تظل اثارها مدة طويلة اتم اتعالج منها بسسسس الحمدلله استخدمتها و ابدا ما طلعت لي حبوب ابدا و الله العظيم ناسبتني بطريقة مو طبيعيه ما شاء الله حيل حيل استانست عليها , و أتمنى ان الكل يجرربها و تناسبكم كلكم بتدعون لي , الراس ما يدور مثل باقي الفرش بس الشعيرات تتحرك بنظام الاهتزاز يعني باختصار تهتز و تدخل الشعيرات الصغيره للمسام و تنظف من قلب و هذا اللي امميز الكلاراسونيك عن غيرها هي الأولى بنظام الاهتزاز , لها سرعتين تتحكمين فيها طبعا بضغطة وحده تشتغل مدة دقيقه كاملة و هو اللازم للتنظيف اليومي , و الله يا بنات قبل كنت احط ميك اب يوميا و اشله بمناديل عادي و أتوقع انه راح خلاص و لما بديت استخدم الفرشاه يوميا فالليل بعد ما اشل المكياج اكتشفت شكثر بقايا مكياج تظل بوهي و انا ما ادري هالسوالف هي اللي تدمر البشره و تتعبها , اللي ميزانيتها ما تسمح ممكن انها تشتري فرشاه يدوية و تستخدم سكراب او غسول مناسب تتفرك فيه يوميا بعد إزالة المكياج نصييييحه من اخت لكم لا تكتفون بمجرد المنايل فقط انتبهوا , الحين طبعا هالفرشاه صارت متوفرة عندنا في سيفورا و بنفس السعر تقريبا و ابشركم بعد منها الوان وااايد وردي و ليموني و اخضر و ازرق الألوان تحمس هههههه و في بعد الجهاز بلس نفس الفكرة بس البلس مخصص أيضا لتنظيف بشرة الجسم كامل روووعه اتوقعه للأسف ما جربته قلت اجرب فرشاه الويه اول و باذن الله ناوية اجربها بعد , شحنها حلو اول ما تاخذينها تشحنينها مدة 24 ساعه بالضبط و عقب تستخدمينها يوميا دقيقه وحده و تظل معاج كم أسبوع أتوقع ثلاث أسابيع اذا ما خاب ظني و هي ضد الماي طبعا , جد جد جميلة بكل معنى الكلمة و تستاهل كل فلس .
أتمنى يعجبكم الموضوع و تستفيدون منه .
الله يحفظكم جميلاتي ,, دمتم بود ..