العنايه الصحيه السليمه للشعر

مرحبا جميلاتي الاميرات ,, اليوم ناويه اتكلم عن شي جميل فينا ,و شي يعتبر من اهم ملامح الانوثه فالبنات ,, شي يخليج اميره جميله ,, الشعر ,, منو تحب الشعر القصير ؟؟ و منو تحب الشعر الطويل؟؟ و في بنات يحبون يصبغون شعرهم و يحبون يجددون ,, و في بنات ما يحبون يصبغون يعشقون شعرهم و لونه الطبيعي ؟؟ في بنات يحبون يصيرون شقرر ,, و في بنات لو صبغوا يحبون يكون لون بسيط جدا ,, كلنا اذواقنا مختلفه و ما يعني اني قاعده احدد مقياس للجمال و لا قاعده احط قاعده معينه نمشي عليها عشان نصير جميلات ,, مثلا وحده مول ما تحب تصبغ شعرها و فجاه قررت انها تغير و تصبغه اشقر !! عادي شو المشكله التغيير يغر النفسيه و يجدد روتين الحياه و يمكن يكون شكلها وايد احلى بهاللون و يمكن لا ,, اختلافنا يعني ان لكل وحده راي و شخصيه مستقله و هذا اجمل شي فالبنت انها تكون منفرده برايها و متمزه و واثقه من نفسها و من مظهرها ,, المهم سامحوني اذا تفلسفت شوي خخخخخ ,, خلونا بموضوع العنايه بالشعر طبعا في شي يمكن انتوا تجهلونه انه الماي نفسه ياذي الشعر !! ممكن بعضكم يعرف و ممكن البعض استغرب ,, هيه لان الماي فيها كلور و صوديوم و مكونات ثانيه تنشف الشعر و تعرضه للتقصف و اللي ابا اقوله انه غسل الشعر بالماي و الشامبو يوميا مضر بصحته و جماله يعني كل يومين او ثلاث بس ممكن تغسلونه و بعد ضروري تختارون الشامبو المناسب لشعركم ,, شوفوا شو مشكلة شعركم ؟؟ ناشف خذوله شي يرطب ,, دهني زياده ؟؟ خذوله شي ينشفه شوي ,, ضعيف و خفيف ؟؟ خذوله شي يكثفه و يعطيه صحه و حيويه اكثر و هكذا.. و شي ثاني الزيت ,, واااايد مهم يا بنات انكم تدهنون شعركم بزيت لاااازم ادري ما تحبونه بس عشان تحبون شعركم و عشان يكون بصحه ممتازه و ما يعاني مشاكل و ما تتفشلوون منه و تزعلون عليه لازم تدهنونه اسبوعيا على الاقل ,, انا عن نفسي ادهنه قبل لا اغسله لازم قبلها بساعتين ادهنه و الفه البس كاب و اخليه و عقب اغسله عدل بالشامبو ,, و لا تنسون حمام الزيت بعد وايد مفيد للشعر انا حتى بعد ما اغسله من الزيت بالشامبو ارجع احط حمام زيت و اغطيه عشر دقايق و انا الهي عمري بسكراب جسمي او صابون مغربي ,, و بعد شي ثاني اسويه اسبوعيا لشعري ,, الماسك , لازم تحطون ماسك على شعركم نص ساعه اسبوعيا ماسك يكون مغذي و مفيد طبعا للحين انا بس اشتري ماسكات جاهزة و احطها ناويه ان شاء الله قريب اني اخلط الماسك و اسويه بنفسي و راح انشر بلوق مخصوص عن الماسك اللي راح اسويه و طبعا بعد ما اجربه و اخبركم تجربتي معاه ان شاء الله ,, و بخصوص البنات اللي يحبون يصبغون شعورهم بعطيكم كم نصيحه اول شي لا تصبغون عند اي حد لازم يكونون مادحين لكم حد و حد مجربينه قبل ,, ثاني شي اذا شعركم غامج وايد لا تفتحونه فجاه تدرجوا باللون يعني اصبغوه بني شوي و عقب افتح على مراحل و خلوا بين كل صبغ و الثاني فتره تريحون فيه شعركم و تغذونه شهرين زين ,, و بعد اهتموا بشعركم بعد الصبغ وااايد اذا حسيتوا انه نشف في علاجات وايد الحين للشعر منها الكولاجين و البلو اوت و الكيراتين ,, و بعد شغله مهمه جدا جدا انا تحسفت اني سويتها و لا راح اكررها مرة ثانيه ان شاء الله البنات اللي يثصون شعرهم انتبهوا من القص باستخدام الموس انتبهوا يقصون عليكم يقولون لكم يكثف الشعر و يعطيف فوليوم !!! انتبهوا لا تقصون الا بمقص لان الموس يقصف الشعر و يخلي اطرافه ناشفه و بايخه ,, ونسيت شي مهم بعد اقوله تذكرته توني لما طريت الاطراف ,, الاهتمام بالاطراف بعد غسل الشعر مهم جدا جدا لازم بعد ما تنشفونه تحطون زيت ما يدهن على الاطراف مثل زيت ارغان او زيت زهور طبيعيه او سيروم معالج لتقصف الشعر ,, و في ثاني انا اسويه تقريبا كل ثلاث اسابيع الى شهر و هو اني احني شعري ممكن بعضكم ما يحب يحنيه او يخرب لون صبغته بس الحنة وايد تبرد على فروة الراس و تسحب الطاقه السلبيه بشكل مو طبيعي تخليكم هاديين رايقين ,, سامحوني على الاطاله و اتمنى تكونون استمتعتوا و استقبل اراءكم و اقتراحاتكم فاي وقت و لا تنسون تكتبون تعليق تحت احبكم و احب اقرا تعليقاتكم ,, بحط لكم صور عن بعض منتجاتي المفضله تحت ..

الله يحفظكم حبيباتي دمتم بود ...