البشره الجافه

مرحبا جميلاتي ,,

كيف اصبحتوا اليوم ؟؟

اليوم ان شاء الله حابه أتكلم عن موضوع وايد بنات طلبوه مني أتكلم عنه و هو : كيف نعتني ببشرتنا الجافه ؟؟ و شو هي افضل المنتجات لها ؟؟

طبعا اهم شي فموضوعنا اليوم هو الترطيب ,, بس قبل هالشي راح أتكلم عن البشره الجافه و شو الأشياء اللي ممكن نتجنبها و شو اللي ممكن يخفف من هالجفاف ,, اهم شي يا بنات الماي اللي نشربه يوميا هل هو كافي ؟؟ اقل كميه او الكمية اللي المفروض يشربها الانسان يوميا هي ثمان اكواب ماي بس انا اقولكم انها غيره كافيه اذا كنتي تعانين جفاف او تاخذين نوع معين من الفيتامينات او كان اكلج مافيه خضروات و فواكه او كنتي من مدمني الكوفي و غيره من اللي يحتوي على كافيين , حطيلج دبة ماي عودة تعبينها و ممكن تحطين فيها قطع فواكه اذا حابه تغيرين  , و كل ما خلصت عبيها بهالطريقه راح تعرفين كمية الماي اللي تشربينها يوميا ,الاكل الصحي اهم شي و اول خطوة تجاه بشره صحيه و جسم و سليم ما تعرفون شكثر الماي مفيد حق كل شي و ما تتخيلون شكثر من المشاكل حلها بسيط جدا و هو الماي ((وجعلنا من الماء كل شيء حي )) الشعر الاظافر الجلد كلهم محتاجين ماي بكمية مناسبه عشان تظهر عليهم علامات الصحه ,, اللي يعانون من بشره جافه لازم تنتبهون للصابون اللي تستخدمونه و الشامبو أيضا , لازم يكونون مرطبين ترطيب عالي لان الجفاف حتى بفروة الراس راح يسوي مشاكل مثل القشره و الحكه و ضعف في الشعر و بالتالي تساقطه ,, الصابون لازم يكون يحتوي مواد مرطبة مثل الشيا و البابونج و الحليب و البابايا و الخيار بس الحين وااايد في منتجات تحتوي على هالاشياء مع ذلك ما ترطب !! انا راح ارشح لكم منتجات استخدمتها شخصيا و وايد استفدت منها و صدق شفت نتيجه ,, سيتافيل براند طبي متوفر في الصيدليات صابون و غسول و لوشن و بعد بالمرز من افضل الكريمات المرطبه للبشره و عندكم زبدة الشيا الخام ممتازة جدا و بالنسبه للشامبو راح تلقون فالصيدليات شامبوات مرطبة مناسبه للبشره الجافه شخصيا ما استخدمت لاني دايما ارطب شعري بماسكات و حمامات زيت و زيوووووت عليكم بزيت الشعر يا بنات اللي تعاني من جفاف سببه الكبير صدقوني انج ما تدهنين شعرج اقل شي مرتين فالاسبوع و بزيت ممتاز مثل زيت جوز الهند او الزيتون او املا هذيل من افضل الزيوت اللي تعطي نتيجه مع الاستخدام المستمر و اقل شي تخلون الزيت بشعركم ساعتين قبل ما تغسلونه و شغله بعد لازم ما تغسلون شعركم يوميا هالشي وايد يضر و ينشف الشعر , لازم تخلون فروة الراس تفرز الدهن الطبيعي عشان يستفيد الشعر منها مب معناها تخلونه شعركم أسبوع مب غاسلينه لا ,, اللي شعرها يدهن وايد على الأقل تغسل يوم و تترك يوم و هكذا ,, بالنسبه لبشره الجسم لازم بعد كل شور ترطبون جسمكم كاااامل , عن نفسي ادهنه مرتين مرة الصبح بعد الشور و مره فالليل قبل النوم لاااازم , و يفضل انج تسوين سكراب بعد عشان تطيح بقايا قشور الجلد الناتجه من الجفاف و عقب ترطبينه عدل , و لا تنسون واقي الشمس قبل ما تتعرضون للشمس انتبهوا لهذه النقطه المهمه , في بنات يقولون لي مرايم عندنا تغير في لون بشره يدنا و اسمرار و هم يعانون من جفاف , طبعا الجفاف الشديد يتسبب بتغيير لون بشره الجلد اذا ما لقت البشره ترطيب مناسب و بعد قالولي نحن نحط دايما مرطب لليدين بعد مافي فايده !! انتبهوا يا بنات تحطون مرطب و تطلعون فالشمس بدون ما يكون فيه واقي ؟؟ اكيد لازم لان الكريم المرطب راح يمتص حرارة الشمس بشكل كبير و راح يغير اللون و يغمجه اكيد , اذا استمريتوا على طريقتي ان شاء الله شهرين متواصلين راح تشوفون نتيجه تنبهرون منها انا وحده ما كنت اقتنع بهالامور و ما كان عندي صبر بس عقب تعلمت اهتم اكثر بنفسي و اصبر و اشوف النتيجه بعيوني و الحين قاعده اتعلم اكثر و حابه افيدكم .

 

راح احطلكم الصور تحت ان شاء الله ..

الله يحفظكم حبيباتي , دمتم بود ..